Duha ka mga gidudahang nalambigit sa pagbaligya og ilegal nga droga ang nasikop sa gilusad nga buy-bust operation sa Barangay Magugpo West, Tagum City, sa gabii niadtong Hulyo 25, 2026.
Ang operasyon gipahigayon sa hiniusang pwersa sa Tagum City Police Station ug sa 1st Davao del Norte Provincial Mobile Force Company (1st DNPMFC). Ang mga nadakpan giila lamang sa mga alyas nga “Eddie Boy,” 29 anyos, residente sa New Corella, Davao del Norte, ug “Fershiela,” 23 anyos, residente sa Barangay New Pandan, Panabo City.
Sa report sa kapulisan, nakapalit ang poseur-buyer og usa ka sachet sa gidudahang shabu gamit ang marked money. Human sa transaksyon, gilayon nga gidakop ang duha ka mga suspetsado.
Narekober sa operasyon ang walo pa ka sachets sa gidudahang shabu, usa ka bukas nga sachet nga adunay residue sa gidudahang droga, ug usa ka brown nga coin purse. Gibanabana nga adunay kinatibuk-ang gibug-aton nga pito ka gramo ang tanang nakumpiskang gidudahang shabu, nga adunay Standard Drug Price nga ₱47,600.
Ang duha ka mga nadakpan anaa na sa kustodiya sa Tagum City Police Station ug nag-atubang og kasong paglapas sa Section 5 ug Section 11 sa Republic Act No. 9165 o Comprehensive Dangerous Drugs Act of 2002.(Camille Santos Naraga)(Source: PNP Tagum City Police Station