DAVAO CITY – Gipahigayon sa Office of Councilor J. Melchor Quitain Jr., uban sa Davao City Culture and Arts Office, ang usa ka seminar niadtong Miyerkules, Nobyembre 12, aron giyaanan ang mga lider sa barangay sa proseso sa pag-ilis sa mga numerically designated barangays ubos sa Poblacion District.
Gidumala ang kalihokan sa Green Conference Room sa Sangguniang Panlungsod, ug gitambongan kini sa 40 ka mga barangay captains nga gihatagan og kasayuran kabahin sa mga giya sa pagpili og mga ngalan nga may kalabotan sa kultura ug kasaysayan.
Sumala ni Councilor Quitain, ang maong inisyatibo nagtinguha nga himoon nga mas mailhan ug mas mapadayag ang pagkakultura ug kasaysayan sa Davao ang matag komunidad.
Si Oscar Casaysay gikan sa Culture and Arts Office, nga usa sa mga imbitadong mamumulong, mipasabot sa mga kultural ug historikal nga konsiderasyon nga angay tagdon sa proseso sa pagpangalan sa mga barangay.(Camille Santos Naraga)(Source: Contributed)