Cebu City – Gikasuko ug maayo ni Lapu-Lapu City Mayor Junard ‘Ahong’ Chan pagkahibawo nga ang bag-o lang gipasug-an nga Datu Lapu-Lapu decals o mga hulagway nga gipatapot sa mga haligi sa viaduct sa Marcelo Fernan bridge gi-vandalize na.
Sa nasayran, tulo ka adlaw pa lang ang nakalabay gahapon sukad sa pagpasiga sa maong mga decals.
Nadawat sa buhatan ni Chan ang paglangkat sa mga hulagway sayo gahapon sa buntag.
Nasubo ug naglagot sa nahitabo, giawhag ni Chan ang mga Oponganon paghatag niyang kasayoran sa mga tawong responsable sa pagpasipa sa mgahulagway ni Lapu-Lapu aron kini madakpan ug masilotan.
Base sa iyang post sa Facebook, si Chan miingon nga iyang ipasubay ang kuha sa mga CCTV camera aron mailhan ug masignit ang mga badlongon sa katilingban.
Nagkanayon ang mayor nga iyang paneguroon nga mapahamtangan og tukmang silot ang naasoyng mga indibiduwal.
Niadtong Domingo gisug-an ang mga decals isip timaan sa pagsugod sa usa-ka-buwan nga kasaulogan sa ika-500 nga anibersaryo sa Kristiyanismo ug Kadaogan sa Mactan. (Jhon Tadlip/JTY)
(News & photo courtesy of Lapu-Lapu City Public Information Office)