Cebu City- Gipahibawo sa Department of Health o DOH 7 nga adunay upat ka pribadong ospital nga nagpaabot nga ma-accredit ang ilang testing laboratory sa coronavirus disease o COVID-19.
Sumala pa sa tigpamaba sa DOH 7, Dr. Mary Jean Loreche, pending pa ang lisensiya sa molecular laboratory sa upat ka tambalanan.
Ang duha sa upat ka ospital nga nangayog accreditation sa RITM o Research Institute of Tropical Medicine ug DOH Manila nahimutang sa Mandaue City ug ang laing duha sa Cebu City.
Matod ni Loreche, naglaom sila nga ang Philippine Red Cross magbaton ug mokuhag lisensiya sa pagpadagan og testing laboratory sa Covid 19 sa siyudad sa Sugbo.
Sa kasamtangan, ang probinsya sa Sugbo aduna lay tulo ka accredited nga COVID-19 molecular laboratories nga makahimo og real-time polymerase chain reaction o RT-PCR tests.
Duha niini ang gipanag-iya ug gidumala sa gobyerno nga anaa sa VSMMC o Vicente Sotto Memorial Medical Center ug ang usa sa compound sa DOH – 7.
Samtang ang ikatulo anaa sa ARC Hospital sa brgy. Agus, Lapulapu City.
Kini ang unang pribadong tambalanan nga gitugtan sa pagpahigayon og RT-PCR test sa virus.