Nagpabilin matod pang anaa sa stable ug maayong kondisyon sa panglawas ang duha ka mga “sabungero” nga nagpositibo sa Covid-19.
Sa pakighinabi sa RPN RADYO RONDA, gikumpirma ni Brgy. Calumpang chairman Arthur Ryan Dupalco nga ang mga nasampit ang gilangkuban sa usa ka residente sa ilahang barangay ug usa gikan sa Barangay Fatima.
Kasamtangan matod pang nagpadayon pa ang ginahimong contact tracing sa nagkadaiyang rural health units personnel sa mga nakahimamat sa maong mga pasyente
“Ang atong RHU team, continue gihapon ang tracing sa katong mga close contacts sa duha ka positibo, sa nahitabo diri sa Calumpang Gallera. Ang isa taga-Barangay Fatima, ang isa taga-Brgy Calumpang sa Purok Placida,” ang tipik sa pamahayag ni Dupalco.
Subli namang gipanghingusgan sa opisyal nga gihimo sa barangay ug sa tig-dumala sa sabgungan ang tanan aron istriktong mapatuman ang health protocol, atol sa maong aktibidad, apan, dili matod pa nila mapugos ang tanang mitambong sa maong sabong, sa pagdisplina sa ilahang kaugalingon.
“Before nag-start ang cockfighting, naa tay gipahigayong disinfection sa area. Nagpahibalo sila sa barangay, basta ang atong hangyo, sundon lang ang protocol. Gisunod nila ang protocol, ang problema, naa sa mga tao. Naa sila’y log book, naay handwashing area, thermal scanner, dili makasulod kung walay face mask, face shield. Ang problema, pagsulod, magkita ang mga kaila, mawala na ang social distancing,” ang dugang pamahayag ni Chairman Dupalco. (image: CTTO)
(JOHN REY SOMIDO)