Cebu City- Mayoriya sa uwahing mga kaso sa Covid 19 nga natala sa DOH o Department of Health gahapon gikan sa Central Visayas.
339 ang bag-ong mga kaso nga natala sa DOH alas 4 gahapon sa hapon hinungdang nahimo nang 10,343 ang tanang nataptan sa virus sa nasod.
Apan sa maong gidaghanon, 205 ang gikan sa rehiyon 7, 111 sa NCR o National Capital Region ug 24 sa ubang bahin sa nasod.
Samtang ang gidaghanon sa mga nakalas sa Covid 19 miabot na og 685 ug ang mga naulian 1,618 na.
Ug sa record nga nahipos sa media hangtod sa Mayo 6, aduna nay 1,571 ka kaso ang Central Visayas diin 29 ang naayo ug 17 ang namatay.
Labing daghan sa maong ihap sa dakbayan sa Sugbo nga mitala og 1,388 nga gisundan sa Mandaue City nga may 90, Lapulapu City – 40, ug Cebu province – 27.
Sukad niadtong Marso, ang Cebu lang sa mga lalawigan sa region 7 ang padayong mitala og bag-ong kaso sa Covid 19.
Ang Siquijor nagpabiling zero sa virus samang sa Negros Oriental ug Bohol wala nay kaso nga gimonitor.
Ang mga local official ug health expert naneguro nga ang nakaingon sa pagsulbong sa mga kaso sa Covid 19 sa Cebu mao ang massive testing ug pagpalapad sa testing capacity sa subnational laboratory sa VSMMC o Vicente Sotto Memorial Medical Center sa dakbayan sa Sugbo.