Cebu City- Nag-una na ang Central Visayas sa labing daghan og kaso sa coronavirus disease o Covid 19 gawas sa NCR o National Capital Region.
Kini human moabot ang ihap sa mga hitaptan sa virus og 600.
Pero alang sa Department of Health o DOH 7, ang pagsaka sa mga kaso naggumikan sa massive testing ug sa gipalapdang surveillance.
Kagahapon, Abril 28, nakatala na ang DOH-7 og 600 ka kaso sa COVID-19 sa rehiyon diin 11 ang namatay ug 28 ang naulian o negatibo na.
Ang uwahing namatay mao ang 17 anyos nga lalaki nga taga brgy. Guadalupe, Carcar ug ang maong pasyente na-diagnose nga adunay sakit sa bato (kidney) niadtong 2018.
Hinuon, matod sa DOH-7, ang fatality rate sa rehiyon nagpabiling dos porsyento lang nga ubos kaayo sa world average nga 6.4 %.
Namatikdan usab sa ahensiya nga kadaghanan sa hidiskobrehang adunay Covid 19 mga batan-on ug lagsik pa sukwahi sa unang hugna sa outbreak sa Central Visayas.
Mao kini resulta sa contact tracing sa unang mga hitaptan uban sa subsob nga swab testing nga nagtukmod kanila pagpalapad pa sa surveillance.