Nikutlo og usa ka kinabuhi ug niangol og upat ka mga tawo ang nahitabong pagka hugno sa riprap atol sa kusog nga ulan. Didto kini nahitabo sa boundary sa Punta Princesa ug Riverside Caduloy, Barangay Tisa, dakbayan sa Sugbo, pasado alas 3:00 sa kadlawon, Septembre 1, 2024.
Ang biktima naila nga si Jamaima Ibuña, 17 anyos ang panuigon, magsaulog pa unta sa iyang adlawng natawhan karong September 13, apan sa wala damha nga panghitabo og subo pamalandungon nga nakalas kini sa nahugno nga riprap ug didto napunta sa ilang panimalay.
Sa imbestigasyon sa CCDRRMO ug sa kapulisan nasayran nga ang riprap sa parking area sa usa ka Construction Supplier maoy nahugno nga adunay mga pinuy-an sa ubos niini. Pito usab ka mga balay ang apiktado sa maong pagdahili sa yuta.
Nahinomduman nga tibuok gabii nakasinati og kusog nga pag ulan ang dakbayan sa Sugbo dala sa LPA. Sa pagkakaron padayon ang imbestigasyon sa maong trahedya nga nikutlo og kinabuhi samtang giatiman pa usab sa tambalanan ang mga nangaangol. (Renante Lada and Ting Joe Pepito)