Nahimong sentro sa imbestigasyon ang usa ka miyembro sa kapulisan human siya giakusahan nga buot lumsan ang tulo ka menor de edad atol sa ilang pagkaligo sa usa ka beach resort sa Barangay Marigondon niadtong Domingo, Agosto 3.
Ang suspek giila nga si Patrolman Celso Petecio, Jr., lumad nga taga Bohol ug kasamtangang na-assign sa Traffic Enforcement Unit (TEU) sa Lapu-Lapu City Police Office. Matod sa imbestigasyon, giingong nakainom si Petecio sa oras sa insidente.
Sumala sa taho, nasuko kuno ang polis sa tulo ka tin-edyer—duha ka lalaki ug usa ka babaye nga pulos 16 anyos nga iyang nakadungan ug kaligo, ug gituohang gituyo kining gitulod ngadto sa lawom nga bahin sa dagat bisan pa sa kusog nga sulog.
Gidala dayon sa kapulisan si Petecio human sa reklamo sa mga ginikanan sa mga biktima, ug kasamtangang giatubang niya ang kaso ilawom sa Republic Act 7610, ang balaod batok sa pag-abuso ug pagpahimulos sa kabataan. Gawas sa kriminal nga kaso, giandam usab ang administrative case nga posibleng mosangpot sa iyang pagkadiskwalipikar sa serbisyo.
Gipadayag sa PNP nga seryoso nilang giatubang ang maong insidente ug mopatuman sila og hustisya base sa resulta sa imbestigasyon. Samtang si Petecio mitambong sa inquest proceedings ug misalikway sa mga pasangil, giingong iyang tumong mao lang ang pagbadlong sa mga batan-on.
Nagpadayon karon ang legal nga proseso samtang giatiman sa ilang pamilya ang mga kabataan nga apektado sa maong insidente.
I via Renante Socia Lada