Patay ang giingong miyembro sa Comaling Gun-for-Hire Group nga si Teodulo Zamora Remolino Jr. human sa engkwentro batok sa kapulisan sa Barangay Jampang sa lungsod sa Argao, pasado alas 12:15 sa udto karong Mayo 27, 2025.
Sumala sa imbestigasyon, usa ka concern citizen ang mitawag sa Argao Municipal Police Station aron isumbong ang pagpabuto og armas sa ilang lugar. Dali kining gitubag sa mga sakop sa kapulisan uban mismo ni Argao Chief of Police PMAJ Janus O. Giangan.
Sa pag-abot sa mga otoridad, ilang nakita ang suspetsado nga armado. Giingon nga gisulayan pa kining pasabton ug gimanduan nga musurender, apan misukol ug mipabuto batok sa mga pulis.
Tungod sa hulga sa ilang kinabuhi, napugos ang mga kapulisan sa pagpanalipod ug mipusil balik nga miresulta sa pagkakalas ni Remolino. Gidali siyang gidala sa Isidro C. Kintanar Memorial Hospital apan gideklarar nga dead on arrival.
Sa crime scene, nakarekober ang mga imbestigador sa usa ka 9mm nga pistola nga walay serial number, usa ka magazine, upat ka buhing bala ug upat ka fired cartridges.
Padayon pa ang imbestigasyon sa kapulisan aron masuta ang kalabotan sa suspek sa mga kalihokan sa gun-for-hire group nga ilang giilang hulga sa kalinaw ug kahapsay sa dakbayan ug kalungsuran sa Sugbo.
I via Renante Socia Lada