Segon sa Cebu City PIO nga gitun-an karon ni Acting Mayor Raymond Alvin Garcia ang kahigayonan nga modeklarar og public emergency tungod sa nagkasaka nga mga kaso sa dengue dinhi sa dakbayan sa Sugbo.
Makigkita pa hinuon siya og balik sa City Health Department (CHD) ug uban pang mahinungdanong mga buhatan aron timbang-timbangon kini.
Kini ang iyang sulti ngadto sa mga sakop sa media sa Sugbo atol sab sa pagpanghatag sa Kagamhanan, pinaagi sa CHD, og mga pang-alkontra sa lamok kagahapong adlawa, Septiyembre 6, 2024, sa Bliss Elementary School sa Brgy. Labangon.
Gituyo niya ang maong interview aron iyang ikapahibawo ug magbantay ang publiko bahin sa kuyaw nga dale sa dengue aron mas makahibawo ug makapanagang sila.
“Mag meeting pa mi ni Dr. (Daisy) Villa. I’ve been meeting her every week just to monitor, ‘nya naa gyuy rise in cases ba. In facdt, we have recorded already eight deaths (for 2024) related to dengue. Ang Cebu City,” pulong ni Acting Mayor Garcia.
“So, mao na nga, it is really a cause for alarm. So, mao na nga gusto nako ipahibawo sa atong public so that they can be aware of it and they can do counter-measures,” dugang niya.
Nisulti si Acting Mayor Garcia nga human siya nahibawo nga nagsaka ang mga kaso sa dengue sa dakbayan, iya dayong gimandoan si Dr. Villa, labaw sa CHD, sa paghimo mga lakang para mapugngan kini.
“Karon, ang gihimo sa City Health Department, adtuon nila ang mga barangay aron mopahigayon og ‘misting’—paasohan kadtong mga posibleng puloy-anan sa mga lamok nga nagdala sa sakit nga dengue,” pulong niya.
“In the barangays, conduct misting, conduct kanang impregnation blankets ba na or curtains…. They’ve been doing that day in day out, kay para lang gyud to control the cases of dengue. But we will meet again and see if there is really a necessity to declare a health emergency,” dugang niya.
Sagad sa mga maigo sa igon mao kadtong mga bata ug mga tiguwang. Sumala sa taho, ang labing bata nga nakalas sa dengue karong tuiga nag-edad og tres anyos, samtang ang labing tiguwan nag-edad og 75 anyos. (Renante Socia Lada)
(Source: Cebu City PIO)