Nakab-ot sa Police Regional Office 7 (PRO7) ang dakong kalampusan atol sa ilang usa ka semana nga anti-criminality campaign nga gipahigayon gikan Hulyo 27 hangtod Agosto 2, 2025. Labing dakong resulta niini mao ang pagkumpiskar sa kapin ₱44.8 milyon nga kantidad sa iligal nga drogas, pagdakop sa 111 ka mga wanted persons, ug pagsakmit sa 49 ka pusil ug mga esplosibo sa tibuok rehiyon.
Matod ni PBGEN Redrico A. Maranan, Regional Director sa PRO7, nakatutok ang ilang kampanya sa pagsumpo sa mga hulga sa seguridad sama sa drogas, sugal, armas nga walay lisensya, ug mga most wanted nga kriminal.
Sa operasyon batok sa mga wanted persons, 111 ang nasikop, diin 19 niini giilang Most Wanted Persons—6 sa regional level, 8 sa provincial level, 1 sa city level ug 4 sa municipal level. Samtang sa gipatigayon nga operasyon kontra drogas, 250 ang nadakpan drug suspects ug nakumpiska ang 6,590.03 gramos nga shabu nga gibanabana og kantidad nga ₱44.8 milyon. Apil usab sa nadakpan ang 23 ka tanom nga marijuana ug 4.10 gramos nga tuyong dahon sa marijuana.
Sa 55 ka operasyon batok sugal, 69 ka tawo ang nadakpan ug nakuha ang ₱16,111 nga betting money. Sa laing bahin, sa 53 ka operasyon batok loose firearms, 49 ka armas ang nasakmit, lakip ang 4 ka eksplosibo ug 158 ka bala.
Nanawagan si PBGEN Maranan sa publiko nga padayon nga makig-alayon sa kapulisan pinaagi sa paghatag og impormasyon ug aktibong pag-apil sa mga programa sa PNP.
Padayon ang PRO7 sa pagpatuman sa mga direktiba sa PNP aron makab-ot ang tinuod nga kalinaw, seguridad, ug kalamboan sa Central Visayas.
Source: PRO7
I via Renante Socia Lada
#rpndykccebu