Nakarekord ang Police Regional Office 8 og total nga 336 ka mga nakalapas sa ordinansa sa tibuok Eastern Visayas isip kabahin sa padayon nga kampanya para sa “Safer Cities” initiative sa Department of the Interior and Local Government.
Sumala sa datos sa PRO-8, ang maong operasyon kabahin sa hugot nga implementasyon sa balaod aron mapugngan ang gagmay nga paglapas sa ordinansa nga posibleng motubo ngadto sa mas seryosong krimen. Kabahin sa mga natala mao ang 238 ka curfew violations, 54 ka kaso sa pag-inom og ilimnon sa pampublikong lugar, 35 ka mga hubog o walay sakto nga sapot sa publiko, ug 9 ka kaso sa saba nga videoke sa gabii.
Sa maong operasyon, 50 ka mga violators ang gipamulta samtang 286 ang gipasidan-an o gireprimand base sa mga existing nga ordinansa sa ilang tagsa-tagsa ka lokal nga gobyerno.
Si PBGEN Jason L Capoy miingon nga importante ang disiplina sa komunidad aron makab-ot ang dugay nga kalinaw ug kaluwasan. Matod niya, ang pagpatuman sa ordinansa sa grassroots level mao ang pundasyon sa tinuod nga seguridad sa rehiyon.
Padayon usab ang pahimangno sa PRO-8 ngadto sa publiko nga magpabiling mosunod sa balaod ug makigtambayayong sa mga otoridad aron mapalig-on ang kaluwasan sa matag komunidad sa Eastern Visayas.
Source: PRO8
I via Renante Socia Lada