Mokabat ngadto sa 162 ka mga langyaw ang naluwas atol sa pagpangronda sa gituhuang POGO hub sulod sa usa ka resort sa dakbayan sa Lapu-Lapu, kagahapon sa hapon, Sabado, Agosto 31, 2024.
Ang pagpangronda gihimo uban sa koordinasyon sa Presidential Anti-Organized Crime Commission, National Bureau of Investigation, Armed Forces of the Philippines, Philippine Center on Transnational Crime ug Inter-Agency Council Against Trafficking.
Ang hepe sa BI intelligence division nga si Fortunato Manahan Jr. niingon nga ang pagpangronda sa Barangay Agus, dakbayan sa Lapu-Lapu gikan sa mission order nga giluwatan ni Commissioner Norman Tansingco batok sa 13 ka mga langyaw nga gimonitor tungod sa overstaying ug nagtrabaho nga walay permit dinhi sa Sugbo.
Nagkadaiyang mga ebidensiya ang nakuha sa mga otoridad sa maong hotel na gituhuang gigamit sa ilegal nga binuhatan.
Ang mga langyaw nga mga Chinese nationals, Indonesians, ug Myanmar, ipaubos sa inquest proceedings ug i-detained sa dili pa i-deport.
Matod ni BI Commissioner Tansingco sa iyang pagtoo nga ang mga resort owners lakip nga mag atubang og kaso-‘ harboring illegal aliens’ sa lugar.
“We will suggest to the authorities to file cases against resort owners to allow their properties to be used by illegal aliens in their covert operations,” mensahi ni Tansingco.
Sa pagkakaron ang mga otoridad nihimo pa og dugang imbestigasyon aron pagsusi kung aduna pa bay posibling laing mga POGO nga naglihok sa naasoy nga siyudad.
Samtang si Lapu-Lapu City Mayor Junard Chan wala pa nagpagawas og pamahayag kalabot sa nahitabong pagronda sa POGO sa dakbayan sa Lapu-Lapu. (Renante Lada, Ting Joe Pepito and Jhon Tadlip)