Ang asawa mismo ang miila sa patay’ng lawas nga nakaplagan nga naglutaw sa kadagatan sa Hilotongan, Bantayan Island pasado ala 1:00 sa hapon kagahapon Agusto 6, 2024.
Pinaagi sa tattoo sa wala nga bukton sa biktima, gikumpirmar sa asawa nga ang patay’ng lawas iya sa iyang bana nga si Leo Brosas, 24-anyos ang panuigon, usa ka mangigisda ug lumolopyo sa Victorias City, Negros Occidental.
Base sa pasiunang imbestigasyon sa kapulisan sa Bantayan, ang asawa nitug-an nga wala na mauli ang iyang bana sukad niadtong Agosto 3, dihang nibiya kini sa ilang panimalay aron managat sa Baliguiang Islet sa Iloilo City.
Nianang pagka Agusto 4, Matod pa sa asawa sa biktima nga adunay nagpahibawo kaniya nga aksidenting natagak sa dagat ang iyang bana dihang nakatulog kini sa bangka nga iyang gisakyan.
Ang asawa sa biktima dali nga nagpatabang sa Philippine Coast Guard ug nihimo dayon kini ug search operation uban sa Bantayan Coast Guard Sub-station sanglit atbang ra man kini sa Buliguiang Islet, ug kagahapon mga ala 1 pasado nakaplagan ang biktima nga naglutaw lutaw sa kadagatan sa Bantayan Island.
Ang patay’ng lawas sa biktima anaa na state of decomposition ug nanimaho na hinungdan nga nakahukom ang asawa niini nga ilubong dayon ngadto sa Bantayan Public Cemetery. (Ting Joe Pepito ug Renante Socia Lada)