Niadtong Biyernes Septembre 20, 2024, tulo ka mga drug personality ang nasikop nga adunay daghang kantidad sa gituohang shabu sa duha ka managlahing drug-bust operation didto sa Bohol.
Ang duha ka mga suspek parehong nasikop sa mga operatiba sa Tagbilaran City Police Station didto sa Barangay Cabawan, dakbayan sa Tagbilaran, uban sa nasakmit ang 315 gramos sa ilegal nga drugas nga adunay Standard Drug value nga PhP2,142,000.00 ug uban pang drug paraphernalia.
Sa managlahing buy-bust operation, nasikop ang ikatulong suspek sa Barangay Totolan, Dauis, tungod sa paghupot og 260 gramos nga ilegal nga drugas nga adunay Standard Drug value nga PhP1,768,000.00 uban sa usab sa mga drug paraphernalia.
Kini nga operasyon sa kapulisan gipangulohan sa mga personahe sa Provincial Drug Enforcement Unit uban sa Dauis Municipal Police Station, ug PNP Drug Enforcement Group/Special Operation Unit 7 sa Bohol Police Provincial Office.
Kining mga ebidensiya nga nakumpiska sa duha ka operasyon isumiter sa Forensic Unit alang sa pagtuki. Sa samang paagi, ang tulo ka mga suspek kasamtangang gitanggong sa kustodiya alang sa tukmang pagpasaka og kaso sa korte nga paglapas sa RA 9165 o Comprehensive Dangerous Drugs Act of 2002.
“The interdiction of these drugs not only disrupts criminal networks but also underscores the importance of an aggressive and relentless anti-drug campaign and collaboration with the people of Central Visayas”, segon ni PBGEN Anthony A. Aberin, Regional Director, PRO7.
Gidayeg usab niya ang mga operatiba nga nalambigit sa pagkasikop sa maong mga drug personality. (Renante Socia Lada)
(Source: PRO-7)