Nasikop sa operasyon sa National Bureau of Investigation-Cebu District Office (NBI-CEBDO) sa Dakbayan sa Mandaue ang duha ka mga indibidwal nga gikatahapan nga nalambigit sa pagpangilad ug pagpahimulos sa mga menor de edad.
Ang mga dinakpan nailhan lang sa ilang mga alyas: si “John,” 29 anyos, pamilyado ug residente sa Liloan, ug si “Chelsea,” 19 anyos, usa ka estudyante nga taga-Danao City.
Gisumbong ang duha sa kasong qualified trafficking in persons human matumbok sa imbestigasyon nga sila nagrekrut og lima ka mga babaye, lakip na ang tulo nga menor de edad, aron itanyag sa ilang mga kustomer.
Sa press conference nga gipahigayon sa NBI-CEBDO, mibutyag si John nga siya ang kontak sa mga kustomer, samtang si Chelsea ang responsable sa pagdala sa mga babaye sa ilang mga kasabutan.
Matod sa imbestigasyon, matag babaye nga madala nila makadawat og ₱1,500, samtang sila duha makakuha og tag-₱500 matag transaksyon depende sa sabot sa kustomer.
Ang ilang kasabutan kasagaran mahitabo sa usa ka restobar sa Liloan, diin mag-inom ang ilang mga kustomer samtang maghulat sa kasabutan. Si John maoy unang mokontak sa mga kustomer ug dayon ipasa ang impormasyon kang Chelsea aron ipadala ang mga babaye.
Apan sa operasyon niadtong Pebrero 28, nadakpan ang duha human makumpirma nga tulo sa ilang mga biktima mga menor de edad—duha ka 16 anyos ug usa ka 14 anyos.
Mipahayag ang mga suspetsado nga wala sila makahibalo nga may menor de edad sa ilang mga gipalista, ug nangayo sila og pasaylo sa pamilya sa mga biktima. Gidala na ang mga suspetsado sa kustodiya sa NBI-CEBDO, samtang ang mga biktima anaa sa pag-atiman sa DSWD.
Source: NBI-7
I via Renante Socia