Nahay-ad nga wala nay kinabuhi kining usa ka lalaki nga nakigsinukliay ug bala tali sa mga pulis ug mga barangay tanod nga niresponde sa insidente niadtong Septiyembre 23, 2024 pasado alas 12:30 sa tungang gabii, didto sa Sitio Mahogany, Barangay Jagobiao dakbayan sa Mandaue.
Ang napatay giila nga si Anthony Abasoto hingkod ang panuigon ug lumulupyo sa Sitio Lourdes sa mao ra usab nga barangay.
Sa imbestigasyon sa kapolisan, sa Basak Police Station, nakadawat sila ug tawag gikan sa usa ka residente sa maong dapit nga may usa ka armadong tawo sa ilang lugar, diha diha dayon daling girespondehan sa mga kapulisan inubanan sa mga barangay tanod, dihang naabot na sila sa lugar nahitaboan, gipabuthan dayon sila sa suspek, hinungdan nga ila kining gibawsan, ug naigo ang suspek nga miresulta sa iyang kamatayon. Wala hinuoy naigo sa habig sa kapulisan ug sa mga tanod nga niresponde sa maong panghitabo.
Nasakmit gikan sa crime scene ang mga armas nga iya sa suspek, usa niini 38 revolver ug ang usa 357 frontier nga revolver. (TJP & Renante Socia Lada)