Matod sa Cebu City Police Office nga himas rehas ang usa ka 26 anyos nga lalaki residente sa Sitio Lawis, Brgy. Pasil ning syudad sa Sugbo human maaresto sa mga personahe sa Labangon Police Station 10, Cebu City Police Office gipanguluhan ni PMAJ ERAÑO S REGIDOR alas 5 sa hapon niadtong Setyembre 22, 2024 didto sa sitio San Pedro sakop sa Brgy. Tisa, ning maong syudad.
Basi sa imbistigaayon, ang maong suspek gialarmahan sa kapulisan human makadawat ug taho nga armado kini ug armas. Dali nga girespondehan sa kapulisan ang suspek nga niresulta sa iyang hinadaling pagkasikop. Nakuha gikan sa iyang posesyon ang nagkadaiyang pakete sa gituohang shabu nga mukabat sa balor ₱68,000.00 nga adunay 10 gramos ang timbang ug .45 kalibre pistol nga adunay 2 ka buhing bala ang nasakmit niini.
Gikataho nga ang maong suspetsado maoy gitumbok nga suspek sa pagpanulis pasado alas 3 sa sayong kabuntagon didto sa dalan sa F. Pacaña sa samang adlaw diin nakuhaan kini ug CCTV Footage sanglit nga nagviral sa social media nga nituon ug armas sa usa ka batan-ong lalaki ug kuha sa cellphone niini. Dayon, sibat gamit ang usa ka motorsiklo.
Padayun ang gihimong follow-up operation sa kapulisan sa kauban niini nga nailhang si alyas “ETCHAY” diin makita sa CCTV footage nga maoy nagmaniho sa motorsiklo. Samtang narekober na sa kapulisan ang gigamit nga motorsiklo sa pagpanulis didto sa Brgy Ermita ning syudad nga kasamtangan nga anaa karun sa kustodiya sa Labangon Police Station 10.
Makita sa mga imahi ang parehong gisul-ob nga senina sa suspek sa iyang pagpanulis ug sa pagkaaresto niini. Kasamtangan nga nakadetained ang suspek sa Labangon Police Station 10 ug nag-atubang sa kasong paghupot ug iligal nga droga ug armas ubos sa R.A. 9165 ug R.A. 10591. (Renante Lada and Ting Joe Pepito)
(Source: CCPO)