Matod sa Cebu City PIO nga tawagon na karon nga Cebu City Mayor Raymond Alvin Garcia.
Kini human nga pormal nga nanumpa si Atty. Garcia atubangan ni Department of Interior and Local Government (DILG)-7 Director Leocadio T. Trovela kaganihang buntag, Oktubre 9, 2024.
Nagsilbi nga acting mayor si Atty. Garcia sukad Mayo 10, 2024 human nga gipahamtangan og unom ka buwan nga preventive suspension ang karon kanhi mayor Michael Rama, tungod sa wala paghatag sa 10 ka buwan nga sweldo sa upat ka mga kawani sa City Hall.
Niining bag-o, niluwat sab og hukom ang Office of the Ombudsman nga sad-an si Rama sa salang nepotismo ug nipahamtang kaniya sa silot nga pagkapapha sa pwesto ug tibuok kinabuhi nga pagdili nga maghupot og bisan unsang katungdanan sa gobiyerno.
Sa iyang pagpanumpa karong adlawa, serbisyohan ni Mayor Garcia ang nahibiling mga adlaw sa termino ni Rama hangtod sa Hunyo 30, 2024
“It is an honor to now serve in a permanent capacity. Just as I have demonstrated as acting mayor for the last five months, I promise to serve with honor, integrity and dedication,” pulong ni Mayor Garcia, human sa iyang pagpanumpa.
Giubanan si Mayor Garcia iyang mga ginikanan nga sila si Ninette ug kanhi mayor Alvin, ug kapikas nga si Kate ug anak nga si Lexie, atol sa yano lang nga seremonyas sulod sa buhatan niya isip bise mayor, hain anha lang gihapon siya mag-opisina bisan sa iyang pagsaka isip permanente ug dili na acting mayor.
“It’s business as usual,” pulong niya, uban sa pag-ingon nga ang opisyal nga titulo iisp mayor wala nag-usab sa mga bulohaton nga iyang gipanghimo isip acting mayor.
“After this, I will return to my duties, continue working on the city’s priorities and being at the service of our citizens,” dugang sa mayor.
Giili niya ang pag-atiman sa panglawas, pabalay, ug pagpasar sa 2025 nga budget nga maoy dinalian nga angay niyang atubangon.
Kabahin sa iyang pagpa-bise mayor, giangkon ni Mayor Garcia nga kini nakapalig-on sa iyang pagkatawo, sa iyang paghigugma sa dakbayan, ug bug-os nga niandam kaniya alang sa katungdanan isip mayor.
Kagahapon, Martes, iyang giduso sa Commission on Elections ang iyang certificate of candidacy, kauban si Atty. Jose Daluz isip bise mayor ug ang 16 ka mga kandidato alang sa Konseho sa Dakbayan ilawom sa hugpong nga KUSUG-Panaghiusa.
Kauban sab nila si Kongresista Rachel “Cutie” del Mar isip maoy kandidato sa grupo alang sa kongreso sa norte distrito.
“One of the most significant takeaways from that experience (as acting mayor) is that taking action swiftly can make a huge difference in the lives of citizens,” pulong ni Mayor Garcia.
Gipaniguro niya nga iyang puy-an ang pasalig nga mahimo siyang “action mayor”, nga iyang nahimo samtang acting mayor pa siya. #
Source: Cebu City PIO
I via Renante Lada and Ting Joe Pepito
RPN DYKC CEBU
675 KHZ AM BAND