Kalambigitan sa illegal nga drugas ang gitan-aw karon sa kapulisan nga motibo sa nahitabong pagpamusil sa mag live-in partner, sulod sa ilang panimalay niadtong Domingo sa alas 3 pasado ang takna sa kaadlawon, Agosto 18,didto sa Sitio Micabaja, Barangay Duljo Fatima, syodad sa Sugbo.
Ang mga biktima mao sila si Saturnino Sericon Biscocho (namatay) ug kapuyo nga si Maribell Fernan Pedroza, parehong mga ex-convict.
Sa imbistigasyon sa Mambaling Police Station 11, duha ka lalake nga nagsul-ob og itom nga jacket, nag shorts, nag kalo ug naka red mask ug laing kauban niini ang nisulod sa ilang gipuy-an ug gipusil silang duha sa makadaghang higayon.
Si Saturnino giingong nakaangkon og samad pinusilan sa agtang ug sa tuo nga aping nga maoy hinungdan sa hinanaling kamatayon,samtang si Maribell naigo usab sa agtang ug naa karon naa sa tambalanan aron magpaalim sa samad pinusilan.
Ang kapulisan sa Mambaling Police Station, aduna nay gisubay nga CCTV Camera, nga posibling makatudlo kung kinsa ang mga responsabli sa pagpamusil sa mga biktima. (Ting Joe Pepito & Renante Socia Lada)