Segon sa Cebu City PIO nga giawhag sa Konseho sa Dakbayan sa Sugbo ang Cebu Port Authority (CPA) nga tugotan ang pampublikong mga sakyanan nga mobiyahe sulod sa mga pantalan dinhi sa atong siyudad.
Tungod kini sa mga reklamo sa mga tawo nga layo kaayo og baktason ang mga pasahero nga manaog gikan sa mga barko nga modunggo dinhi sa dakbayan.
Gawas nga layo og lakwon, sagad sab sa mga pasahero mabiktima sa mapahimuslanon nga mga taxi drivers nga anaa sa gawas sa mga pwerto, ilabi na sa panahon nga nihit ang mga sakyanang pampubliko.
Sa iyang privilege speech atol sa ilang session kagahapong adlawa, Septiyembre 18, 2024, gitug-an ni Konsehal Rey Gealon ang reklamo nga nadawat gikan sa kanhi mayor sa Dipolog City nga si Edelburgo Cheng nga nakasugat sa maong problema niadtong Septiyembre 11.
Pulong Konsehal Gealon, ang lagda nga gipatuman sa CPA sulod sa pantalan makahasol usab sa mga mabdos ug ilabi na gyud sa kadtong adunay mga diperensya sa ilang panglawas.
Nunot niini giawhag sa konseho si Acting Mayor Raymond Alvin Garcia nga tukion kining maong isyu uban sa CPA.
Buot usab sa konseho nga ibalik ang karaan nga “transport provision scheme” sa mga terminal sa pantalan.
Giawhag sab sa konseho ang mga ahensya sa kagamhanan, sama sa Cebu City Transportation Office (CCTO); ang traffic enforcement unit sa Philippine National Police; ug ang Land Transportation Franchising and Regulatory Board sa paghimo og sinulagma nga pagsusi sa mga taxi driver nga magpasakay ra kung pakyaw, aron kini maundang.
Gidasig usab sa konseho ang CCTO nga dumalaon og tarong ang trapiko gawas sa mga pantalan.
Source: Cebu City PIO
I via Renante Socia Lada
#rpndykccebu
#675hzamband
#mrpublicservice