Segon sa Cebu City PIO nga katunga sa mga pasyente sa Vicente Sotto Memorial Medical Center (VSMMC) gikan sa dakbayan sa Sugbo.
Kini ang balita gikan kang Dr. Gerardo Aquino, Jr., chief of hospital sa VSMMC, nga nakapakugang kang Acting Mayor Raymond Alvin Garcia atol sa ilang panagkita bag-o lang.
Gumikan niini, mas gitinguha ni Acting Mayor Garcia nga mahuman na gyud ang Cebu City Medical Center, nga 10 ka mga tuig na nga wala pa gyud matiwas og katukod.
Kini aron nga sa CCMC na moadto alang sa tabang medikal ang mga taga dakbayan sa Sugbo.
“Only the first three floors that is operational and on the third floor, only one third or rather two thirds is operational and remaining (areas and floors) are not operational,” pulong niya atol sa soft opening sa Operation Smile “Cebu Comprehensive Cleft Care” sa ikapitong andana sa tambalanan.
Iyang gibutyag nga laraw niya nga sa dili pa maabot ang piniliay sunod tuig mahuman-human na ang ospital lahos sa ika-10 nga andana.
“That is something that is an aim… That is something I hope to finish maybe 80 to 90 percent before the elections,” pulong ni Acting Mayor Garcia.
Subay niini, gihulma niya ang CCMC Board of Directors, nga gilangkoban ni Dr. Peter Mancao isip medical director, Dr. Anton Oliver Reposar, ug Atty. May Rose Lubino aron maoy monanaw sa pagpadagan, padulngan, ug mga pamalaod sa tambalanan.
Gibutyag sab ni Acting Mayor Garcia nga karon ng Oktubre ipahigayon ang bidding alang sa pagtiwas sa ika ikaupat ngadto sa ika-unom nga andana sa CCMC, dungan sa pagtukod sa ikawalo ngadto na sa ikasiyam nga andana. (Renante Lada and Ting Joe Pepito)
(Source: Cebu City PIO)