Segon sa Cebu City PIO nga nakigtagbo si Acting Mayor Atty. Raymond Alvin Garcia ngadto kang P/Col. Antonieto Cañete, ang labaw sa Cebu City Police Office, aron hisgotan ang pagtubag sa mga “petty” crimes” dinhi sa dakbayan sa Sugbo.
Kini human nag-viral sa social media niadtong Miyerkules ang pagpanguot sa grupo sa mga kawatan nga nibiktima sa usa ka babayeng managkutay sa Basilica Minore del Sto. Niño.
Sumala sa video, wala gyud kabantay ang babaye nga ang nialirong niyang mga babaye sab mga nagkunsabo diay aron siya kuotan.
Matud ni Acting Mayor Garcia, gusto niya nga palawman ni Cañete ang pakisusi sa hitabo aron mailhan ang maong grupo og mapasakaan og kaso.
“Ang Cebu City bitaw maoy tunghaan sa mga criminal elements kay naa man gud diri ang daghang tawo. Mingaw ang ubang mga lugar so diri gyud sila mobuhat sa ilang criminal intention, like robbery,” ingon niya.
“Kaning naay mangunguot that’s a price we have to pay for being a highly urbanized city, but it is no excuse for the police not to do their jobs,” dugang sa acting mayor.
Nalipay hinuon si Acting Mayor Garcia sa nakita niya nga police visibility nga gipatuman ni Cañete sa siyudad.
“You have seen that all around already in Cebu City, nga ang atong mga patrol cars nga walo ka buok are really going around, nagsige na og tuyok ilang mga wang-wang. So, I think we should also put emphasis on public places, not only the streets, on the roads… but also public places of worship, malls, etcetera,” sulti ni Garcia.
Sa niaging adlaw, usa sab ka simulation exercise sa pagpanulis ang gipahigayon sa kapulisan diha sa dalan Leon Kilat nga nakapaukay sa mga tawo sa dapit.
“Akong mando man gud ni Col. Cañete is I don’t want this happening again ang pagtulis. So, it was really initiative ni Col Cañete, ni (City) Councilor Phillip Zafra nga i-specify gyud niya ang mga financial institutions, pawnshops, banks, etcerera,” sulti sa acting mayor.
“Gipangtapok niya, naay simulation, just so we can address particular problems, if ever, it (robbery) will happen again. Pro-active ang ilang gibuhat and I’m very happy nga nituman sila sa akong mando,” dugang niya. (Renante Socia Lada)
(Source: Cebu City PIO)