Nagpagawas og public safety advisory ang Cebu City Government human sa sunod-sunod nga aksidente nga nalambigit sa pagpalupad og tabanog sa nagkalain-laing bahin sa siyudad.
Matud sa mga opisyal, ang pinakabag-ong insidente dili na talagsaon tungod kay adunay kaparehong mga panghitabo nga natala usab kaniadto.
Tungod niini, gihangyo ang mga residente, ilabina sa mga lugar sama sa Pasil, Duljo, Sawang Calero ug kasikbit nga komunidad, nga limitahan ang gitas-on sa pisi sa tabanog aron malikayan ang dugang aksidente.
Gipasabot sa lokal nga gobyerno nga ang pagpalupad og tabanog duol sa karsada nagdala og dakong peligro sa mga motorista, labi na sa mga nagmotorsiklo, tungod kay ang pisi mahimong makatabok kalit sa dalan.
Gipahimangnoan usab ang mga motorista nga moagi sa maong mga lugar nga maghinay sa ilang pagpadagan ug magpabiling alerto aron malikayan ang posibleng disgrasya.
Samtang, nakigtinabangay na ang lokal nga panggamhanan sa CCLEX management nga nagdeploy og mga personnel aron magmonitor sa sitwasyon. Aduna usab mga roving team gikan sa siyudad ug CCLEX nga naglibot aron pahimangnoan ang mga residente, ilabina kadtong nagpuyo ubos sa tulay, bahin sa luwas nga paagi sa pagpalupad og tabanog.
Lakip sa gipahimangnoan sa otoridad ang paglikay sa pagpalupad og saranggola duol sa dalan ug highway, pagpalayo sa pisi gikan sa naglabay nga sakyanan, paglikay sa linya sa kuryente, ug dili paggamit og pisi nga adunay metal.
Giduso sa Cebu City Government ang publiko nga magpalupad lamang og tabanog sa hawan nga lugar aron malikayan ang peligro, samtang gipasiugda nga ang usa ka sayop nga lihok mahimong mosangpot sa grabeng kadaot o pagkawala sa kinabuhi.
Source: Cebu City PIO
I via Renante Socia Lada