Gikumpiskar sa mga otoridad ang mokabat sa ₱75,000 nga kantidad sa mga gituohang ilegal nga sigarilyo atol sa gihimong anti-illegal tobacco operation sa municipal terminal sa Bantayan, Cebu niadtong nakalabay nga mga adlaw.
Ang mga personnel sa Bantayan Municipal Police Station maoy nanguna sa operasyon human madawat ang impormasyon nga adunay gidudahang pagdala ug pag-apod-apod sa imported nga sigarilyo sulod sa lungsod.
Nasakmit sa operasyon ang 50 ka rim nga “San Diego Quality Premium” nga sigarilyo nga wala gitugot ug walay hustong dokumento, nga posible nga paglapas sa mga balaod sa buhis, tobacco control, ug regulasyon sa gobyerno.
Sa inisyal nga imbestigasyon, usa ka trisikad driver ang giingong giabangan sa wala mailhing mga tawo aron magdala sa sigarilyo paingon sa terminal, diin didto unta kuhaon sa laing tawo. Padayon pa karon ang imbestigasyon sa kapulisan aron mailhan ug madakpan ang mga responsable.
Gipasalig sa kapulisan nga ipadayon nila ang ilang kampanya batok sa smuggling ug ilegal nga kalihokan sa pagbaligya sa sigarilyo sa tibuok probinsya sa Cebu. Gidasig usab nila ang publiko nga moreport dayon kung adunay makitang suspek nga kalihokan nga may kalabotan sa smuggling.
📸 CPPO
I via Renante Socia Lada