Nasikop sa kapulisan ang usa ka lalaki nga giingong nalambigit sa ilegal nga drogas atol sa gihimong buy-bust operation sa Barangay San Isidro, lungsod sa San Fernando niadtong nakalabay nga mga adlaw.
Ang operasyon gihimo sa San Fernando Municipal Police Station Drug Enforcement Unit uban sa tabang sa Philippine Drug Enforcement Agency Region 7 (PDEA-7). Nasunod usab ang legal nga pamaagi kay naay presensya sa media ug opisyal sa barangay atol sa operasyon.
Ang nadakpan mao ang usa ka 43 anyos nga lalaki nga giakusa nakalapas sa Republic Act 9165 o Anti-Illegal Drugs Law.
Sa operasyon, nakuha gikan sa suspek ang daghang sachet nga giingong shabu, apil ang gitawag nga “buy-bust money” nga gigamit sa transaksyon.
Ang gidak-on sa nakumpiskar nga gidudahang droga kay mga 1.29 grams ug gibanabana nga nagkantidad og ₱8,772 base sa standard drug price.
Ang mga nakumpiskar nga butang gipadala pa sa Cebu Provincial Forensic Unit alang sa laboratory examination aron pormal nga mapamatud-an kung illegal drugs ba gyud kini.
Ang suspek gipasakaan og kaso ilawom sa Sections 5 ug 11 sa RA 9165, nga nagasilot sa pagbaligya ug pagpanag-iya sa ilegal nga drogas.
Gidayeg sa kapulisan ang maayong resulta sa operasyon ug ilang gipahimangno nga padayon ang ilang kampanya batok sa ilegal nga drogas aron maprotektahan ang komunidad.
Gidasig usab nila ang publiko nga mo-report sa mga ilegal nga kalihukan sa ilang lugar aron mas mapalambo ang kalinaw ug kahapsay sa probinsya sa Cebu.
📸 CPPO
I via Renante Socia Lada