Niabot na sa tulo ka kinabuhi ang nakalas sa nahitabong disgrasya sa mga sakyanan kagahapon pasado alas 3:00 sa kadlawon Oktobre 12, 2024, didto sa Barangay Tajao, Lungsod sa Pinamungajan, Sugbo.
Ang maong disgrasya naglambigit kini og usa ka Toyota Wigo ug Isuzu Prime Mover truck.
Unang nakalas ang drayber sa Wigo na mao si Raydel Jan Booc, 20 anyos ang panuigon, tinun-an. taga Barangay Tubod, Dakbayan sa Toledo.
Human sa pipila ka oras nakalas usab didto sa tambalanan ang mga sakay niini nga mao sila si Stephen Sabornido taga dakbayan sa Ormoc, ug Jade Engle nga taga siyudad sa Tacloban.
Sa pasiunang imbestigasyon sa Pinamungajan Police Station nasayran nga ang prime mover nga gimaniho ni Diomar Caballero Bugna, 39 anyos ang pangidaron, taga Barangay Cabitoonan, Dakbayan sa Toledo, nagbiyahi sa opposite direction sa Wigo nga nagkadasmag sa naasoy nga lugar.
Sa kakusog sa panagbangga nagusbat pag ayo ang Wigo nga maoy hinungdan sa pagkamatay sa drayber niini.
Nasuta usab nga ang mga biktima gikan sa pista nga gituhuang nakainom sa ilimnong makahubog.
Sa pagkakaron gihimo pa ang dugang imbestigasyon samtang padayong gitanggong ang drayber sa truck. (Renante Lada and Ting Joe Pepito)