Segon sa Cebu PIO nga gikatakda nga magpadala na si Acting Mayor Raymond Alvin Garcia og suwat ngadto sa Camp Crame aron isulti ang nagustohan niya sa upat ka mga opisyal sa Philippine National Police (PNP) nga gipapilian isip sunod nga labaw sa Cebu City Police Office (CCPO).
Giklaro hinuon niya nga kuntento ra siya sa nahimong labok ni P/Col. Antonietto Cañete, nga kasamtangang officer-in-charge sa CCPO.
“Yes, yes, yes, I am still satisfied with the performance of the police big boss. Maayo man nila pagka-handle sad. Dili man sad ka makaingon nga daghang krimen nga nahitabo ila nang sa’a, although that is their obligation (to prevent them),” ingon ni Acting Mayor Garcia.
“They should also make sure nga mapangitaan og not only solution, mapangitaan kinsay sad-an para we can put the people perpetrating the crime behind bars,” dugang niya.
Gisulti niya kini atol sa usa ka press conference karong adlawa, Septiyembe 20, 2021 sa mga sakop sa media sa Sugbo.
Lima unta ka mga pangalan ang gipapilian sa PNP kang Acting Mayor Garcia apan si P/Lt. Col. Dyan Agustin nadestino na isip acting director sa Lapu-Lapu City Police Office.
Ang gipapilian kang Acting Mayor Garcia mao nalang sila si Cañete, P/Lt. Col. Arnel Banzon, P/Lt. Col. Jovito M. Atanacio ug P/Lt. Col. Randy Caballes.
Si Atanacio mao ang kasamtangang hepe sa Police Regional Office-7 Information and Communications Technology Management Division, samtang si Caballes kanhi hepe sa Talisay City Police Station ug si Banzon kanhi sa Negros Oriental.
Pulong ni Acting Mayor Garcia dili matapos ang Septiyembre aduna na unay siyay pangalan nga iduso ngadto sa PNP Headquarters isip maoy sunod nga CCPO director. (Renante Socia Lada)
(Source: Cebu City PIO)