Gipahigayon sa Cebu City Police Office (CCPO) ang usa ka dungan nga operasyon ubos sa “Safer Cities Initiative” isip pagsunod sa direktiba sa Department of the Interior and Local Government (DILG).
Pinangulohan ni PCOL. George V. Ylanan, City Director sa CCPO, ang maong kalihokan uban sa nagkadaiyang ahensya sama sa BPLO, CCTO, DSWS, CESET, ug mga Barangay Public Safety Officers (BPSO). Gipahigayon kini kagabii sa Abril 8, 2026 gikan alas 10:00 sa gabii hangtod alas 12:00 sa tungang gabii.
Tumong sa operasyon ang estriktong pagpatuman sa mga espesyal nga balaod ug city ordinances lakip na ang pagdili sa pag-inom ug pagpanigarilyo sa pampublikong lugar, anti-mendicancy law, ug curfew alang sa mga menor de edad.
Atol sa operasyon, daghang mga violators ang nadakpan ug gihatagan og citation tickets tungod sa ilang mga paglapas.
Girespondehan usab sa mga otoridad ang mga menor de edad nga nasakpan nga naglaag lampas sa curfew ug giturn-over kini sa Department of Social Welfare and Services (DSWS alang sa hustong pag-atiman ug interbensyon.
Gipasiugda sa CCPO nga ang maong inisyatiba kabahin sa pagpalig-on sa crime prevention, visibility policing, ug pagsiguro sa kalinaw ug kahapsay sa komunidad. Nagpadayon usab ang ilang paningkamot sa pakigtambayayong sa ubang ahensya ug sa katawhan aron mapalambo ang kaluwasan sa Cebu City.
Source: CCPO
I via Renante Socia Lada