Patay diha-diha dayon ang usa ka babaye nga naligsa tunga sa karsada.
Ang aksidenti nahitabo pasado 1:00 kaganihang kadlawon, Decembre 19,2022, didto kini nahitabo sa N. Bacalso Ave., Barangay Poblacion, Siyudad sa Sugbo.
Ang biktima nga nakalas giila ni PCMSG Renante Abozo, ang traffic investigator sa Pardo Police Station-7 nga mao si Mitchelle Cañeda, 19 anyos ang panuigon, dalaga, buntis, residenti sa Lawaan 1, Dakbayan sa Talisay.
Sa imbestigasyon nga gihimo sa maong Police Station nasayran nga hubog nga nitabok sa karsada si Cañeda og natabangan kini sa nakakita niya nga mao si Gilbert Mataverde, usa ka Brgy. Tanod sa maong Barangay.
Apan nibalik kini sa paglabang og nihigda tunga sa karsada, didto na kini naligsan sa SUV ug na segundaan pa sa usa ka L300 nga sakyanan.
Sa pagkakaron dugang imbestigasyon ang gihimo sa Pardo Police Station samtang ang katapusang nakaligis sa biktima atua sa ilang kostudiya nga naila usab nga si Olsen Rojo, 25 anyos ang panuigon, taga Dakbayan sa Sugbo. (Renante Lada)