Segon sa Cebu City PIO nga dako kaayo og natabang ang mga bio-fence nga gipangbutang sa mga sapa sa pagpaminos sa makuha nga mga basura gikan sa mga coral reef dinhi sa dakbayan sa Sugbo.
Matud ni Reymarr Hijarra, labaw sa Cebu City Environment and Natural Resources Office (CCENRO), nga nagka-istorya sila mismo ni Ed Karlon Rama, labaw sa Bantay Dagat Commission, ug iyang nahibaw-an nga niminus na og maayo ang mga basura nga ilang makuha gikan sa mga kagasangan o coral reef.
Kini iyang nahibaw-an atol sa tigom sa CCENRO ug sa BAntay Dagat niadtong Huwebes, Agusto 29, aron hisgotan ang ika-17 nga Cebu Citywide Clean-Up Challenge.
“Niminus gyud og maayo ang mga basura nga anaa sa atong mga corals base sa ilang mga observation. I think every other week na sila ((taga-Bantay Dagat) mag clean-up didto mo-dive didto. Pero ang water quality medyo sobidahon pa,” pulong ni Hijarra.
Sa pagkakaron, gipadayun sa CCENRO ang pagbansay sa mga barangay dinhi sa siyudad sa Sugbo unsaon sa paghimo sa bio-fence nga ibutang sa ilang tagsatagsa ka mga sapa. (Renante Socia Lada)
(Source: Cebu City PIO)