Segon sa Cebu City PIO nga adto na sa Ayala Heights pagahimoon ang programa alang sa ika-17 nga Cebu Citywide Cleanup Challenge inay sa naandan nga dapit nga mao ang Il Corso Lifemalls diha sa may South Road Properties (SRP).
Matud sa pangulo sa Cebu City Environment and Natural Resources Office nga si Reymarr Hijarra, nga gawas sa pagpanglimyo sa kabukiran karong Sept. 21, 2024, nga mao sab ang “International Coastal Cleanup”, mananom sab og kawayan ang mga moapil sa kalihokan.
Tungod kini kay ang cleanup dungan sab sa pagtapos sa pagsaulog sa Septiyembre isip “Bamboo Month”.
“Gawas nga atong i-promote ang bamboo industry, ang dako sad nga tabang nato ani (kawayan) kay mogunit siya sa yuta para…dali modahili, makapugong sa landslides,” sulti ni Hijara.
Paagi sab unya ang clean-up pagduso sa pagpananom ug kawayan isip tinubdan sa panginabuhian sa mga mag-uuman, nga ang pagbuhat sa ingon makatabang sab sila sa pagpugong sa baha dinhi sa ubos nga bahin sa dakbayan.
Gipahibawo sab ni Hijara nga gawas sa naandan mga mangapil ug mga volunteer sa ika-17 nga Cebu Citywide Cleanup Challenge, motambong sab unya ang mga opisyal, sama pananglit sa mga bise mayor, sa mga lokal nga pangagamhanan.
Pulong niya, niabot na og 12 ka mga grupo ang nipadayag sa ilang kaikag sa pagsalmot sa cleanup, sama pananglit ang Carolinian Environmental Society, Cebu Business Park Lions Club, og Code Green PH. (Renante Socia Lada)
(Source: Cebu City PIO)