Gibutyag sa Cebu City PIO nga tinguha ni Acting Mayor Raymond Alvin Garcia nga hatagan og Christmas bonus ang tanang nga honorarium-based barangay workers, lakip na ang mga magtutudlo sa daycare dinhi sa siyudad sa Sugbo.
Gipahibawo niya kini atol sa gipahigayon nga Family Day 2024 sa mga daycare workers ug mga child development workers, kauban ang ilang mga pamilya, gikan sa 80 ka mga barangay dinhi sa siyudad sa Sugbo, kagahapong adlawa, Septiyembre 22, 2024 sa Family Park, Barangay Talamban, Cebu City.
“Akoa nang gihatagan og instructions ang Local Finance Committee nga ipaapil sa Supplemental Budget No. 3 ang Christmas bonus alang sa atoang mga daycare teachers ug ang tanan nga nagdawat og honorarium, makakuha na gyud og Christmas bonus gikan sa siyudad sa Sugbo,” sulti ni Acting Mayor Garcia.
Iya hinuong giklaro nga moagi pa sa Konseho ang mao niya nga mando ug ma-approve kini osa pa mahatag maong bonus.
Gawas sa pagpabahibawo kabahin sa bonus, gipasalamatan sab ni Acting Mayor Garcia ang mga daycare workers tungod sa ilang mga paningkamot alang sa kaayohan sa mga bata.
“Salamat kaayo sa inyong gibuhat para sa atong mga bata kay nahibaw bitaw gyud mo nga ang atong mga bata maoy kaugmaon sa atong dakbayan sa Sugbo ug maoy mopuli diri kanamo isip mga leader sa atong pinalanggang siyudad. Salamat sa tanang daycare teachers,” sulti niya.
Atol sa maong kalihokan, nihatag og 50 ka sako sa tag-25 kilos nga bugas si Acting Mayor Garcia aron ipa-raffle sa mga nitambong sa maong kalihokan.
Gipahigayon sab atol sa maong kalihokan ang Induction sa Parent’s Federation Officers alang sa north district ug sa south district sa dakbayan. (Renante Socia Lada)
(Source: Cebu City PIO)