Gibutyag sa Cebu City PIO nga subling gipahibawo ni Acting Mayor Raymond Alvin Garcia nga human sa iyang pakigtigom sa mga sakop sa mga opisyal sa Sinulog Foundation Inc. (SFI) niadtong Biyernes, pabiling sa Cebu City Sports Center (CCSC) ang Sinulog 2025.
Ingon niya, nagdahom siya nga makasugat siya og kalisod sa iyang pakigkita sa mga opisyal sa SFI, nga pinangulohan ni Engr. Pericles Dakay, niadtong Biyernes, Septiyembre 20, 2024, apan nahimong hapsay ug tulin ang ilang panag-istorya.
“Nindot kaayo among discussion, grabe ang cooperation ug ang tinabangay, og wala gyuy mga hitches whatsoever. We have the same goal in mind—to make sure that our Sinulog it is not only the celebration our fiesta but more important, halad ni ni Señor Sto. Niño,” sulti ni Acting Mayor Garcia.
Si Dakay maoy nagpatawag og Executive Committee Meeting sa mismong panimalay niini nga gitambongan usab sa pipila ka personalidad nga naglakip nilang Acting Vice Mayor Donaldo Hontiveros, Konsehal Jocelyn Pesquera, ug Konsehal Phillip Zafra.
Lakip sa nahisgotan nga ang venue sa Sinulog 2025 anha gyud sa CCSC ug dili sa SRP.
“Wa man silay pagsupak. They all agreed. Mao lagi na kung maghiusa lang lagi ta, makab-ot gyud nato ang atong damgo. Ilabi na karon para ug alang ni Señor Santo Niño,”ni Acting mayor Garcia pa.
Lakip sa nahisgotan ug nasabotan sa maong tigom mao nga patas-an ang premyo sa mananaug sa Sinulog 2025.
Nauyonan sab nga patas-an ang subsidy sa kada contingent aron maingganyo gyud sila nga mangapil sa gipaabot nga mao unyya labing engrande nga Sinulog sa kasaysayan niini. (Renante Socia Lada)
(Source: Cebu City PIO)