Nalumos ug namatay si Emilita Manatad Piscador, 74 anyos, residente sa Sitio Canumay, Barangay Labogon, Mandaue City, sa nakalabay nga adlaw. Gikatahong nawala siya niadtong Lunes sa gabii human wala na mopauli gikan sa pagpanginhas ug kabibe sa baybayon.
Matod ni Police Lt. Col. Mercy Villaro-Kantuna sa Mandaue City Police Office, nakadawat sila og report alas 7:28 sa buntag mahitungod sa usa ka tawo nga nakit-an nga wala nay kinabuhi sa daplin sa baybayon.
Sa inisyal nga imbestigasyon, nasayran nga katapusang nakita si Piscador alas 5 sa hapon niadtong Hunyo 8. Sumala sa iyang mga paryente, kanunay siyang manginhas og kabibe ug mangdakop og alimango sa maong lugar apan dili siya kahibalo molangoy.
Nagtuo ang pamilya nga posible siyang aksidenteng nalumos samtang naghimo sa iyang naandan nga buluhaton duol sa dagat. Apan, gipatin-aw sa kapulisan nga padayon pa ang imbestigasyon ug wala pa matino ang opisyal nga hinungdan sa iyang kamatayon.
Gitawag usab ang Scene of the Crime Operatives (SOCO) aron mosusi sa lugar ug mokolekta og ebidensya, samtang mitabang ang City Disaster Risk Reduction and Management Office sa pagresponde. Ang lawas sa biktima gidala sa St. Anne Funeral Homes ug gihulat pa ang resulta sa autopsy aron masayran ang eksaktong hinungdan sa iyang pagkamatay.
📸 File
I via Renante Socia Lada