Nagtamposisok karon sa Parian Police Station ang 42 ka mga indibidwal human nasikop sa mga kapulisan sa Parian Police Station, dihang adunay usa ka concerned citizen ang mitawag sa 911. Kabahin sa mga tawo nga nagpasabong og kaka nga adunay pusta nga kwarta sa ilang lugar.
Dali kining gi respondihan sa mga kapulisan sa Parian Police Station, ubos pagpangulo ni PMAJ Marvin BENOLIRAO FEGADIRO, Pag-abot nila sa lugar, ilang naaktuhan ang mga indibidwal nga nagsugal og pinaagi sa pagtari og kaka, hinungdan nga ilang kining gisikop didto sa Sitio Lawis, Brgy. Lorega San Miguel, Cebu City, ka gabii, Septyembre 23, 2024.
Nasakmit gikan sa mga akusado ang mga ebidensya, upat (4) ka improvised nga gamay nga kahon nga adunay traynta dos (32) ka buhing kaka, duha (2) ka improvised nga spider fighting arena nga gihimo sa mga sticks nga adunay stand platform table, ug pusta nga mukabat sa kapin duha ka libo ka pesos sa lain-lain nga denominasyon.
Gipahibaw ang mga akusado sa ilang mga salaod nga nahimo ug sa ilang mga katungod isip usa ka dinakpan. Kasamtangang anaa na karon sa Parian Police Station ang mga akusado samtang giandam na sa kapulisan ang pagpasaka og kaso nga may kalapasan sa balaod nga PD 1602 ngadto sa piskalya. (TJP & Renante Socia Lada)