Cagayan de Oro City – Ang Regional Inter Agency Task Force on Emerging Infectious Disease (RIATF-EID) nagpasar na sa Resolution No. 119 series of 2020 o ang hangyo sa pagdugang sa tulo (3) ka isolation facilities sa dakbayan sa Cagayan de Oro gumikan sa nagkataas nga coronavirus disease (COVID-19) cases. Atol sa NorMin, COVID-19 Response Task Force press conference, gisugilon ni Department of Interior and Local Government (DILG)-10 Assistant Regional Director Yvette Tolentino-Sunga nga aduna nay proposal ang Department of Public Works and Highways (DPWH) ngadto sa ilang Central Office aron ang pagtukod sa maong isolation facilities.
Ang maong mga isolation facilities ang pagatukuron unya sa Upper Puerto ug Brgy. Macasandig nga adunay 20 ngadto sa 30 nga bed capacity matag usa. Nasayran nga ang DPWH nagtinguha usab sa pagpabarog sa susamang isolation facilities sa Lunotan, Gingoog City, Misamis Oriental nga adunay 37-bed capacity; Talairo, Oroquieta City ug Misamis Occidental nga adunay 90-bed capacity.
Alang sa Misamis Oriental, si DOH-10 Regional Director Adriano Subaan mibutyag nga gumikan kay ang OWWA Misamis Oriental Provincial Hospital sa Alubijid gihimo naman nga temporary treatment and monitoring facility, ilang pangitaan nga mapalig-on pa ang kapasidad niini.
Gidugang ni Dr. Subaan nga nakigkoordinar sila karon sa Provincial Government of MisOr, DPWH ug BFP aron sa pagdevelop sa maong area nga makatabang kini sa COVID-19 response diin pwede ang maong area makahupot sa 50 ka mga pasyente.
Base sa report niadtong Biyernes, Oktubre 2 ang rehiyon-10 nakarecord sa total nga 2,907 confirmed case sa COVID-19 diin 1,643 ang nakarecover, 78 ang nakabsan sa kinabuhi ug 1,186 ang padayon nga pagparecover. (Philippine Information Agency-10)