Cagayan de Oro – Nag-una ang dakbayan sa Cagayan de Oro City sa ubang highly urbanized nga mga siyudad (HUCs) sa tibuok nasod sa natad sa locally sourced revenue, nga nakamugna og 24.52 porsyento nga pagtubo alang sa fiscal year 2022.
Kini, human ang dakbayan sa Cagayan de Oro ubos sa pagpangulo ni City Mayor Rolando ‘Klarex’ A. Uy nag-una isip ‘Highest (Top 1) Year-on-Year Growth in Local Source Income’ para sa fiscal year 2022 sa tanang highly urbanized nga mga siyudad. (HUCs) sa nasud.
Si City Administrator Atty. Roy Hilario P. Raagas ug City Treasurer Jasmin T. Maagad pormal nga nakadawat sa pasidungog atol sa awarding sa ‘National Top-Performing Provinces, Cities and Municipalities in Strengthening Local Government Finance for FYs 2022 and 2023′ isip kabahin sa Bureau of Local Government Finance (BLGF) 37th Anniversary: ​​Stakeholders’ Recognition, Oktubre 9, 2024 sa Seda Manila Bay sa Parañaque City.
Niadtong 2022, ang Cagayan de Oro City nag-una sa siyam ka laing HUCs sa nasud nga adunay 24.52 porsyento nga pag-uswag sa locally sourced revenue aron malabwan ang Mandaue City sa Cebu nga nakamugna og 21.73 nga pagtaas sa locally sourced revenue. Sa miaging tuig, ang siyudad sa Cagayan de Oro nahimutang sa ikapito sa top 10 HUCs nga adunay 12.9 porsyento nga pagtubo sa locally sourced revenue.
Ang datos gikan sa Oro Trade and Investment Promotions Center, pinangulohan ni ORO-TIPC chief John Asuncion, nagpakita nga ang lokal nga kita sa Cagayan de Oro City padayon nga misaka gikan sa P2.702 bilyon sa 2021 ngadto sa P2.864 bilyon sa 2022 ngadto sa P3.128 bilyon sa 2023.
News and Photo CIO CDO