Cagayan de Oro – MALAMPUSONG natapos ni Atty. Spencer Palen sa City Mayor’s Office ang 6-ka bulan nga Korea Heart-to-Heart (K2H) Program bag-ohay lang nga gipasiugdahan sa Governors Association of Republic of Korea pinaagi sa sister city tali Cagayan de Oro ug Gwangyang, Korea.
Atol sa courtesy visit niini kang Mayor Rolando A. Uy adlaw’ng Lunes, gipresentar ni Atty. Palen ang mga natun-an ug kasinatian gikan sa unom ka bulan nga pagpuyo ug pagtuon sa maong nasud.
Dako usab ang pasalamat ni Atty. Palen sa maong kahigayonan nga iyang narepresentar ang Cagayan de Oro ug mapaambit usab ang kulturang Kagay-anon sa maong nasud.
Nasayran nga gihatagan usab si Atty. Palen og usa ka Honorary Public Official Certificate gikan mismo kang Mayor Chung In-hwa sa Gwangyang, Jeollanam-do, isip pag-ila sa iyang dakong kontribusyon sa lain na usab nga malampusong K2H Program, human nga kini napili nga usa sa Top 8 sa final report niini nga ‘Gwangyang City’s Best Practices in Foreign Relations Initiatives’.
Kahinumduman nga nagsugod si Atty. Palen sa iyang work immersion sa Korea niadto’ng bulan sa Abril isip representanti sa Cagayan De Oro sa Korea Heart-to-Heart (K2H) Program.
News and photo by CIO CDO