Dako ang posibilidad nga mahatagan na og balay ang usa ka person with disability (PWD) human siya gipaatiman ni Mayor Rolando ‘Klarex’ Uy sa mga kadagkuan sa City Housing & Urban Development Department (CHUDD) atol sa ‘People’s Day’, Miyerkules Enero 18, 2023, nga gipahigayon sa city hall quadrangle.
Nasayran nga niadto pang 2016 nag-apply sa housing program ang 49 anyos nga si Cristeta Abueva apan hangtod karon wala pa siya nahatagan og balay taliwala sa iyang kahimtang.
“Gipabalik-balik ra ko sa una kay nawala daw ang akong requirements nga gipasa,” pamahayag ni Abueva.
Kini nga hitabo ang gikasubo pag-ayo ni Mayor Klarex nga taliwala sa lisod nga kahimtang ni Abueva nga usa ka buta wala gayud nahatagan og higayon nga matabangan.
Nasuta usab sa mga personahi sa CHUDD nga anaa sa data ang pangalan ni Abueva apan wala kini mga requirements hinungdan nga gitambagan siya nga subling magkuha sa mga gikinahanglan nga requirements.
Ug aron dili mabug-atan sa mga galastuhon, gihatagan siya ni Mayor Klarex og gamay nga tabang pinansiyal aron masiguro nga makuha niya ang mga requirements.
Gipasalig sa CHUDD nga mahatagan nila og unit si Abueva sa higayon nga makumpleto niini ang iyang mga papeles.
Nunot niini, gipasalamatan ni Abueva si Mayor Klarex nga mitagad sa iyang problema ug mihangyo sa CHUDD nga atimanon siya aron mahatagan og balay.
(Source: CIO-Cagayan de Oro, photo courtesy by Jomar Figuracion)