I-turnover na ni Mayor Rolando `Klarex’ Uy ang iyang gisaad nga 10 ka bag-ong mga patrol cars ug dugang walo ka police motorcycles ngadto sa Cagayan de Oro City Police Office (Cocpo) ugma, Sept. 21, 2022.
Ang mga bag-ong sakyanan usa sa gisaad ni Mayor Klarex isip suporta ngadto sa kapulisan ning syudad aron mas epektibo sa ilang mga tahas diha sa pagpatuman sa kahapsay ug kalinaw.
Ang napulo ka Toyota Fortuner patrol cars gikatakdang ihatag sa 10 ka mga police stations ning syudad.
Dumduman nga 10 lang ka patrol cars ang unang gisaad ni Mayor Klarex ngadto sa Cocpo apan gidugangan niya kini og walo ka police roving motorcycles, diin nasayran nga personal nga kuwarta sa mayor ang gipalit sa maong mga motorsiklo.
Naglaum usab si Mayor Klarex nga ampingan sa kapulisan ang mga sakyanan aron molungtad kini og dugay alang sa ilang matag adlaw nga tahas diha sa pagpahapsay sa kalinaw aron mapanalipdan ang katawhan sa dakbayan sa Cagayan de Oro batok sa nagkadaiyang krimen.