CAGAYAN DE ORO CITY- Sukwahi sa pagtuo sa uban, ang bus sa RTMI o Rural Transit Mindanao, Inc nga nasunog sa probinsya sa Bukidnon sa miaging adlaw dili hinimuan sa New People’s Army o NPA. Mao kini ang gisugilon ni Bureau of Fire Protection Investigator FO2 Dave Dalis human adunay suspetsa nga gisunog sa maong mga rebelde ang nasangpit nga bus didto sa Barangay 7, Malaybalay City, Bukidnon.
Sa imbestigasyon sa otoridad, ang bus mobyahe unta paingon sa Kibawe sa dihang kalit lang nag-aso ang likod niini nga miresulta sa pagkasunog.
Sa gibutyag ni FO2 Dalis nga daling nanganaog ang 13 ka pasahero ug apil ang driver nga si Renan Diabordu sa dihang nabantayan ang kalayo.
Hangtud sa pagkuha ning maong report, dili pa matumbok ang hinungdan sa pagkasunog sa maong sakyanan nga hangtud karon padayon pa ang imbestigasyon.
(Photo courtesy of Mary Jean Madjos)