Aprobado na sa konseho sa syudad ang resolosyon nga nagdeklarar sa bulan sa Pebrero nga Covid-19 Frontliners Month.
Sa sesyon sa konseho niadtong Lunes nga gidumala ni bise mayor Kikang Uy, hiniusang gisagop ang resolusyon nga giduso ni konsehal Edgar Cabanlas, chairman sa komite sa urban/rural poor and housing development, nunot sa tinguha nga mahatagan sa pasidungog ug pag-ila ang mga frontliners nga padayon nga nakigbatok sa Covid-19 dinhi sa dakbayan.
Sa maong resolosyon, giawhag si mayor Oscar Moreno pagmugna og commemorative council nga maghikay ug magpatuman sa mga programa nga maghatag og pasidungog sa mga frontliners lakip na niadtong mga frontliners nga nagbuhis sa ilang kinabuhi aron lang sa paghatag og seguridad sa katawhan nga malikay sa virus.
Aron dili mahikalimtan ang gibuhat nga sakripisyo sa mga frontliners ang konseho nakahunahuna nga tagaan sila sa pasidungog, dugang ni Cabanlas.
Dako ang akong pasalamat sa mga medical ug non medical frontliners nga gilangkoban sa mga opisyal sa barangay, BHERTS, doctors, nurses, mga ordinaryong empleyado ug uban pang hut-ong sa katilingban. (SP)