Alas 8 kagainang buntag nakadawat ang Bureau of Fire Protection nan impormasyon nga may sunog sa Ouano Ceniza Heights. Mikadto sa City BFP si Lawrence Go nga nasunog ang bodega nga gipanag-iya ni Dr. Ophelia Go-Quintero nga nahimutang sa 8183 Ouano Ceniza Heights, Surigao City.
Pagresponde sa kabomberohan, nakontrolar nila ang sunog alas 8:20 sa buntag ug hingpit napalong alas 8:43 sa buntag.
Ang stockroom gama sa light materials ug g.i. sheets ang roofing ug kahoy ang dingding nga may 6 meters by 2 meters dimension. Ang bodega nahimutang sa likod sa ilang balay. Nahibaw-an sumala sa imbestigasyon ni SFO1 Joed Odvina nga nagrenovate sa ilang balay si Dr. Quintero samtang ang mga bag-ong gamit sa didto gibutang sa bodega sama sa sala set, dining table, 3 ka mga airconditioning machine, range top, mga sinena, hardwood para sa flooring ug uban pa. Gibanabanang P200,000 ang damyos.
Sa wala pa kini mahitabo, gisugo ni Dr. Quintero ang housemate nila nga maghinlo sa likod sa balay ug halingan ang ugang mga dahon. Nabiyaan ang hinaling ug mikanat ang kalayo sa stockroom nga duna sab mga ginamit nga pintura.
Giabisohan sa BFP ang tag-iya nga dili maghaling sa mga sagbot kay kini kalapasan sa RA 9003. Ug kon may madamay nga silingan, mahimong makasuhan sa Reckless Imprudence resulting to Damage to Property. Ang paghaling sa mga sagbot may tulubagon usab sa balaud sama sa multang 300 ngadto sa 1,000 pesos o pagkabilanggo sa usa ngadto 15 ka adlaw or sa duha ka penalty nga mag-agad sa mando sa korte. (RPN DXKS)