Davao City – Gisipot ni Senador Antonio Trillanes IV ang pagbasa og sumbong kaniya sa upat ka kasong libel nga gipasaka ni Presidential son Paolo Duterte ug abogado Mans Carpio sa Branch 54 sa Regional Trial Court (RTC) sa Hall of Justice sa dakbayan sa Davao, kagahapong adlawa.
Sayo pa lamang sa buntag miabot sa syuda ang Senador gikan sa kaulohan midiretso dayon sa hotel ug pagka-alas 8:30 mideretso kini sa Hall of Justice sa Ecoland. Human sa iyang pagtambong sa korte, gi-atubang sa senador ang mga media nga nag-atang kaniya.
Atubangan sa mga sakop sa Media, gibutyag ni Senador Trillanes nga usa lamang ka pagpangharas kaniya ang gipasang-at nga kaso batuk kaniya nila ni Pulong ug Carpio aron libugon ang iyang huna huna isip kretiko sa Administrasyon.
“Mga harassment cases to, para ma-distract ako, pero I will continue my mandate as an opposition,” suma ni Trillanes.
Hinuon gibutyag sa Senador nga iyang girespito ang korte sa dakbayan sa Davao hinungdan sa iyang pagtambong sa arraignment sa giatubang nga kaso. Kabahin usab sa iyang mensahe kay Kanhi Vice Mayor Paolo Duterte ug Atty. Mans Carpio nga mipasang-at ug kaso batuk kaniya, lignin kuno ang kalibutan ug moabot ra usab ang panahon nga ang duha na usab ang makadawat ug hagit.
“Umiikot ang mundo sinasalo ko lang ang lahat ng mga paghamon na binibigay nila sa akin, pero darating din ang panahon na sila rin ang tatanggap ng hamon,” saysay pa ni Trillanes.
Human sa pakighinabi sa media mibiya dayon si Trillanes, nga gwardiyado sa iyang mga kauban. Samtang anaa si Trillanes sa sulod sa korte, gwardiyado sa kapulisan ang palibot sa korte gani duna pay pwersa sa Special Weapons and Tactics sa Davao City Police Office ang gibutang sa lugar.