Agsagsaganan ti Provincial Government of Ilocos Norte (PGIN) babaen ti Gender and Development Office (GAD) para ti selebrasyon ti “Women’s Month” iti masungad a bulan ti Marso.
Segun kenni Mrs. Janet London, mangidadaulo ti GAD, marugian dagiti maisayangkat nga aktibidad intuno March 2 babaen ti “Run for Gender Equity.”
Imbatadna a mangrugi daytoy iti sangoanan ti Kapitolio Probinsial ken agatiddog iti tallo a kilometro ti tarayen dagiti partisipantes.
Inbunannagna a libre ti registration ken dagiti umuna a 200 a makapagrehistro ket maipaayan ti t-shirt ken pammigat.
Kabayatanna, inpakaammona a kas kadagiti kallabes a tawen, kangrunaan nga aktibidad ti “Kinni-kinni Parade” a maiyuswat intuno March 8 a mabigbig nga “International Women’s Day.”
Impalgakna a daytoyen ti maika-sangapulo ket dua a tawen a pannakaiyuswatna a narugian manipod pay idi ni Sen. Imee Marcos ti gobernador ti probinsia.
Inlawlawagna a kas iti napalabas a tawen ket dagiti maibilang nga “straight men” ken agserbi a “muse” ket nasken nga agarwat a pangbabai ken agusarda iti “pointed” a “high heels.”
Imbatadna a kadagiti kallabes a tawen ket nangpili lang dagiti judges ti naikkan ti number ken dagitoy ti na-qualify a semifinalist ngem ita a tawen ket maummong amin a muses ken mammaminsan nga agrampa dagitoy ti sango ken ditoy a mangpili dagiti judges ti sangapulo a sumrek iti semifinals ken ditoy a mapili ti Kinni-kinni queen.
Malaksid iti daytoy, inbunannagna nga adda met lang ti mapili a best kinnikinni group ken most colorful group.
Kabayatanna, kunana nga ita a tawen ket nagkoordinar ti Provincial Health Office ken ti Philippine Obstetrical and Gynecological Society of Ilocos Norte a mangisayangkat ti Search for Buntis Queen ken mangipaay met dagitoy ti premyo kadagiti mangabak.
Innayon ni London nga adda pay dagiti sabsabali nga aktibidad a maiyuswat kas paset ti selebrasyon ti “Womens Month” kas iti “self-defense training para kadagiti ubbing nga agad-adal ti sekondaria kangrunaanna kadagiti ili nga adu ti nagbalin a biktima ti panangabuso.
(Irene Ringor)
(Source: Provincial Government of Ilocos Norte)