30.9 C
Manila
Friday, March 29, 2024

Batac: Patas a pannakatratar dagiti kakailian, kalikagum ni Gob. Marcos Manotoc

- Advertisement -

Napinget ti kalikagum ni Gob. Matthew J. Marcos Manotoc a maitultuloy ti pannakaipaay ti tulong kadagiti kakailian a dati a kameng ti communist/terrorists group ken sectoral front organization ti Ilocos Norte.

Daytoy ti inbunannagna bayat ti panagbalinna a kangrunaan a sangaili ken nagsarita iti pannakadadael dagiti nakunpiskar a paputok ken “improvised boga” ken iti pannakaipaay ti tulong pinansial ken “food packs” kadagiti dati a kameng ti rebelde a grupo ditoy Ilocos Norte a naisayangkat iti Ilocos Norte Police Provincial Office.

Inlawlawagna a paset daytoy iti tarigagayna a mangiparikna kadagiti nadakamat a kakailian nga adda ti kaimudinganda iti probinsia.

Segun iti gobernador, silulukat ti gobierno probinsial a mangarakup kadagitoy ken sindadaan a tumulong tapno agbalin a naannayas ken balligi ti pannakipulapol dagiti maseknan iti komunidad.

Impatalgedna a nakasagana a makipagtrabaho kadagitoy pakairamanan dagiti mayor ken punong barangay a pagnanaedan dagitoy tapno maipasigurado a komportable ken maipaay dagiti kangrunaan a kasapulan dagitoy iti inaldaw.

Impalgak ni Gob. Marcos Manotoc a maysa kadagiti pakaisentroan ti imatang ti gobierno probinsial ita a tawen ket masigurado a komportable ken maipaayan ti oportunidad dagiti kakailian a maaddaan ti pamastrekan nga agserbi iti pamilia ti tunggal maysa.

Kagiddan daytoy, sinaludaranna ti liderato ti INPPO a mangisigurado iti linak, urnos ken talna ditoy probinsia.

Innayonna a saan laeng nga iti naimballigian a panangallukoy kadagiti kakailian nga agsubli iti salinong ti gobierno ngem iti panagbalin manen a katatalgedan a probinsia ti Ilocos Norte iti intero a pagilian. (Cita Macalipis)

(Source: Provincial Government of Ilocos Norte)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -