Manamnama a mangisayangkat ti benchmarking iti Ilocos Norte Agriculture Fishery and Extension System dagiti nadumaduma a rehyon ditoy pagilian a nangisayangkat ti PAFES National Assessment ditoy probinsia itay napalabas a lawas.
Imbatad ni Engr. Teresa Bacnat, Officer In-charge ti Provincial Agriculture Office a naruay a rehyon ti nangipadanon ti kalikagumda nga agsubli nga umay ag-benchmarking a kas iti inkari da ken ni Gob. Matthew Marcos Manotoc.
Segun kenkuana, impalgak dagiti maseknan a kalikagumda a makita ken maadal dagiti inaramid ti probinsia.
Inbunannagna nga umuna nga agsubli dagiti manipud iti Caraga region nangnangruna iti Surigao del Sur a nangituding a dagus iti aldaw a panagsublida.
Kunana a manamnama a mangrugi ti iyuswat dagitoy a benchmarking ditoy probinsia intono Disiembre nuebe.
Inlawlawagna nga ad-adda pay a nainspiraran dagiti nangisayangkat ti PAFES National Assessment a mangipatungpal ti PAFES iti bukudda a lugar apaman a nakitada ti naiget a suporta ni Gob. Marcos Manotoc.
Mamati ni Bacnat a kalpasan ti CARAGA ket sumaruno dagiti dadduma pay a rehyon a mangisayangkat ti benchmarking ditoy probinsia.
Mainaig iti daytoy, impatalgedna a kanayon a nakasagana ti INAFEC a mangsangaili kadagiti interesado a mangisayangkat ti benchmarking ditoy probinsia.
Innayonna nga agsipud ta pilot province ti Ilocos Norte iti PAFES ket kanayonda nga agplanplano ken ni Atty. Pancho Jose a director ti INAFEC no ania dagiti maipresentar ken no kasano a maipakita kadagiti maseknan dagiti proyekto ken aktibidad ti probinsia iti ruar. (Ronald Domingo)
(Source: Provincial Government of Ilocos Norte)