Saan a mailadawan ti kinaragsak ni Senador Imee Marcos iti naimatanganna nga agtultuloy a suporta dagiti Ilokano iti pamilia Marcos kabayatan ti selebrasyon ti maika-107 a panagkasangay daydi Pres. Ferdinand Edralin Marcos Sr. iti siudad ti Batac.
Tinawen a makalawas a ramrambakan ti Ilocos Norte ti kasangay daydi Apo Lakay babaen iti pannakaisayangkat iti nadumaduma nga aktibidad nga addaan ti gagem a mangipaay ti pammadayaw iti naibatina a pakalaglagipan kenkuana nangnangruna iti pannakamuli ti pagilian.
Inbunannag ti senador bayat ti panangipaayna ti mensahe a nagtalinaed a sibibiag ti amana iti puso dagiti Filipino nangnangruna kadagiti Ilokano a namuli babaen iti lideratona.
Kangrunaan a dinakamatna dagiti agad-adal iti pampubliko a pagadalan ti sekondaria ken kolehio ken unibersidad kas iti Mariano Marcos State University a naiyestablisar babaen iti amana a nagarapaap a babaen iti nasao nga unibersidad ket saanen a kasapulan pay a mapan agadal idiay Manila dagiti agtutubo ditoy probinsia.
Inlawlawagna a dagiti naruay a naaramidan ti amana ti agtultuloy a pagnamnam-ayan dagiti Filipino kas kadagiti naiyestablisar a kalsada, rangtay, pantalan ken erupuerto.
Malaksid iti daytoy, inbunannagna nga agtultuloy a pagnamnam-ayan dagiti mannalon ken mangngalap dagiti inpasdekna a proyekto infrastraktura a dakkel a tulong iti panagdur-as ti pagilian ken dagiti naiyestablisar a “medical institutions” a nagtalinaed a pakabenbenipisiaran dagiti umili a filipino agingga kadagitoy a gundaway.
Innayon pay ti Senador nga ania man a rigat ken pannakaallilaw ket agtalinaed ti panangipannakkelna a maysa daytoy a Filipino.
(Source: Provincial Government of Ilocos Norte – Communications & Media Office)